ខេត្តកំពង់ឆ្នាំង ៖ នៅថ្ងៃពុធ ទី២៣ ខែតុលា ឆ្នាំ២០២៤ ដោយទទួលការអនុញ្ញាតដ៏ខ្ពង់ខ្ពស់ពីលោក កើត រិទ្ធ ឧបនាយករដ្ឋមន្ត្រី រដ្ឋមន្ត្រីក្រសួងយុត្តិធម៌ និងជាប្រធានអាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក.) និងតាមការណែនាំពីលោកបណ្ឌិត ជិន ម៉ាលីន អនុប្រធានប្រចាំការនៃ អ.ដ.ក., លោក យ៉ម ផារ៉ូត អគ្គលេខាធិការនៃអគ្គលេខាធិការដ្ឋាននៃ អ.ដ.ក. រួមនិងសហការីបានជួបប្រជុំជាមួយលោក ស៊ុន សុវណ្ណារិទ្ធិ អភិបាលនៃគណ:អភិបាលខេត្តកំពង់ឆ្នាំង ដើម្បីពិភាក្សាពីលទ្ធភាពនៃការចុះអនុស្សរណ:នៃការយោគយល់គ្នារវាងអាជ្ញាធរជាតិដោះស្រាយវិវាទក្រៅប្រព័ន្ធតុលាការ និងរដ្ឋបាលខេត្តកំពង់ឆ្នាំង។ 

នៅក្នុងកិច្ចប្រជុំនេះ លោក​ យ៉ម​ ផារ៉ូត​ បានលេីកទ្បេីងអំពីខ្លឹមសារគោល​សារសំខាន់​ និងភាពចាំបាច់នៃកិច្ចសហប្រតិបត្តិការរ​វាងស្ថាប័នទាំងពីរ​តាមរយៈ​ការចុះនូវ​អ​នុស្សរណ:នៃការយោគយល់គ្នានេះ។

ដូចគ្នា​ផងដែរ​ លោក​អភិបាលខេត្ត​ក៏បានសម្តែងនូវការស្វាគមន៍​ និងការគាំទ្រចំពោះការផ្តួចផ្តេីមរៀបចំឱ្យមាននូវអនុស្សរណនៃការយោគយល់គ្នានេះ​ជាមួយរដ្ឋបាលខេត្តកំពង់ឆ្នាំង​ ដែលតាមរយ:​កិច្ចសហប្រតិបត្តិការនេះ​ នឹងអាចរួមចំណែកក្នុងការលើកកម្ពស់ការដោះស្រាយវិវាទជូនប្រជាពលរដ្ឋដែលរស់នៅខេត្តកំពង់ឆ្នាំងនេះផ្ទាល់។